سعودی ولی عہد شہزادہ محمد بن سلمان نے پاکستان میں سرمایہ کاری 10 ارب ڈالر تک بڑھانے کا جائزہ لینے کی ہدایت کر دی۔
سعودی عرب کے سرکاری خبررساں ادارے ایس پی اے کے مطابق اس سرمایہ کاری کے متعلق گزشتہ برس اگست میں اعلان کیا گیا تھا۔
25 اگست 2022 کوسعودی فرمانروا شاہ سلمان بن عبدالعزیز نے پاکستان میں ایک ارب ڈالر سرمایہ کاری کرنے کا حکم جاری کیا تھا، جسے اب بڑھا کر 10 ارب ڈالر تک لے جانے کا جائزہ لیا جائے گا۔
خبررساں ایجنسی ایس پی اے کے مطابق ولی عہد نے سعودی فنڈ فار ڈیویلپمنٹ کو یہ ہدایت بھی کی ہے کہ وہ پاکستان کے مرکزی بینک میں سعودی عرب کی جمع شدہ رقم کو 5 ارب ڈالر تک بڑھانے کا جائزہ لے۔
یہ فیصلہ شہزادہ محمد بن سلمان اور وزیراعظم شہباز شریف کے درمیان ہونے والی ملاقات کے بعد کیا گیا۔
دو دسمبر 2022 سعودی فنڈ فار ڈیولپمنٹ نے سٹیٹ بینک آف پاکستان میں جمع تین ارب کے ڈپازٹ میں توسیع کی تھی تاکہ پاکستان کو معاشی چیلنجز سے نمٹنے میں آسانی فراہم کی جا سکے۔
