بین الاقوامی مالیاتی فنڈ (آئی ایم ایف) نے بے نظیر انکم سپورٹ پروگرام سے مستفید ہونے والوں کی تعداد میں اضافے کی تجویز مسترد کردی۔
اعلیٰ حکام نے سماجی بہبود کے پروگرام کے دائرہ کار کو وسیع کرنے کی تجویز دی تھی تاکہ خط غربت سے نیچے زندگی گزارنے والی 20 سے 30 فیصد آبادی کو سہ ماہی وظیفہ فراہم کیا جا سکے۔
آئی ایم ایف نے بی آئی ایس پی کی مختص رقم میں 40 ارب روپے کا اضافہ کرنے کی توثیق اور منظوری دے دی تھی، اسے 8.9 ملین مستحقین کے لیے رواں مالی سال کے لیے 360 ارب روپے سے بڑھا کر 400 ارب روپے تک لے جایا گیا تھا، لیکن حکومت کوریج کو مطلوبہ سطح تک بڑھانے کی تجویز پیش نہیں کر سکی۔
آئی ایم ایف نے غربت کی لکیر سے نیچے زندگی گزارنے والی تقریباً 30 فیصد آبادی کو ماہانہ وظیفہ فراہم کرنے کے لیے کوریج بڑھانے کے لیے پراکسی مین ٹیسٹ (پی ایم ٹی) کو جیک اپ کرنے کے حکومتی مطالبے کو یہ کہتے ہوئے ماننے سے انکار کر دیا ہے کہ حکومت کے پاس بجٹ کے لیے مطلوبہ وسائل نہیں ہیں۔
وزارت خزانہ کے ایک اعلیٰ اہلکار نے کہا کہ اس معاملے پر کوئی اختلاف نہیں ہے، اس پر ایک واضح معاہدہ تھا جس کے تحت حکومت 8.9 ملین مستحقین کو 7000 روپے کا سہ ماہی وظیفہ فراہم کر رہی ہے۔
ذرائع نے بتایا کہ حکومتی مذاکرات کاروں نے آئی ایم ایف کے جائزہ مشن سے پہلے یہ خیال پیش کیا تھا کہ اس کا دائرہ زیادہ سے زیادہ کرنے کے لیے پی ایم ٹی کی حد میں اضافہ کیا جائے۔
ان کا کہنا تھا کہ ٹیکسوں اور یوٹیلیٹی قیمتوں میں اضافے کے ذریعے آئی ایم ایف کے تجویز کردہ سخت نسخوں پر عمل درآمد کے بعد سی پی آئی پر مبنی افراط زر میں اضافہ دیکھنے میں آئے گا۔
فنڈ کے عملے نے ابتداء میں اس کی مخالفت نہیں کی لیکن ٹیکس ریونیو بڑھانے اور غیر ہدفی سبسڈیز کو ختم کرنے کا کہا۔
آئی ایم ایف کے اعلیٰ حکام نے دلیل دی کہ حکومت کے پاس بی آئی ایس پی کی قومی سماجی و اقتصادی رجسٹری (این ایس ای آر) کے تحت ایک بھرپور ڈیٹا بیس موجود ہے، اور اسے بجلی، گیس پر ہر قسم کی ٹارگٹڈ سبسڈی فراہم کرنے اور پی او ایل کی فراہمی کے لیے استعمال کرنے کی ضرورت ہے۔
فی الحال اس تجویز پر عمل نہیں ہو سکا۔ لیکن، جون 2023 میں توسیعی فنڈ سہولت کے تحت موجودہ پروگرام کی میعاد ختم ہونے کے بعد ایک نئے آئی ایم ایف پروگرام کے امکان کو مدنظر رکھتے ہوئے ، پاکستان اور آئی ایم ایف کو مہنگائی سے متاثرہ عوام کو بڑھتی ہوئی قیمتوں سے بچانے کے لیے ٹارگٹ سبسڈی میکنزم رکھنا ہوگا۔
ٹارگٹڈ سبسڈی میکانزم کو شروع کرنے کے لیے مختلف تجاویز پر تبادلہ خیال کیا گیا لیکن آخر کار مختلف وجوہات کی بنا پر حتمی فیصلہ نہیں ہو سکا۔
ہفتہ وار حساس قیمت انڈیکس (SPI) ہفتہ وار بنیادوں پر 45.64 فیصد کو چھو چکا ہے اور فروری 2023ء میں ماہانہ بنیادوں پر کنزیومر پرائس انڈیکس (CPI) کچھ زیادہ تجاوز کر گیا ہے۔ CPI اور SPI دونوں میں اگلے ہفتوں اور مہینوں میں اضافہ یقینی ہے۔
کمزور اور مزدور طبقات کو مختصر اور درمیانی مدت میں غربت کی لکیر سے نیچے آنے سے بچانے کے لیے ٹارگٹڈ سبسڈی میکانزم کے علاوہ کوئی چارہ نہیں ہے۔
