اس وقت یوٹیوب اور مختلف سوشل میڈیا پلیٹ فارمز پر ویڈیو کریٹرز کو رقم کی ادائیگی کی جاتی ہے، البتہ ٹوئٹر اس دوڑ سے باہر رہا ہے۔
اب اس بات کا امکان پیدا ہو گیا ہے کہ ٹوئٹر بھی ویڈیوز اپلوڈ کرنے والوں کو معاوضہ دینا شروع کر دے گا۔
یہ امکان منگل کو ایلون مسک کی ایک ٹویٹ کے بعد پیدا ہوا ہے جس میں انہوں نے اس حوالے سے اشارہ دیا ہے۔
انہوں نے ایک ٹویٹ پر جوابی کمنٹ کرتے ہوئے کہا کہ دیکھتے ہیں اس وقت کیا ہو گا جب ٹوئٹر اچھی ویڈیو بنانے والوں کو زیادہ بہتر معاوضے کی پیشکش کرے گا۔
اس کے بعد ٹوئٹر پر بحث شروع ہو گئی کہ کیا ایلون مسک ٹوئٹر ویڈیوز پر بھی مونیٹائزیشن کا آپشن شروع کرنے لگے ہیں؟
اس سے قبل انہوں نے ایک ٹویٹ میں بتایا تھا کہ گزشتہ ہفتے کے دوران پلیٹ فارم پر 16 لاکھ نئے ایکٹو صارفین کا اضافہ ہوا ہے۔
ایک صارف نے ان سے پوچھا کہ یوٹیوب کے روزانہ کتنے ایکٹو صارف ہوں گے؟
ایلون مسک نے جواب میں ایسا ہی آپشن دینے کا ذکر کیا تو ان سے مزید سوال کیا گیا کہ کیا صرف ویڈیو کریٹرز کو ہی مونیٹائزیشن کی سہولت میسر ہو گی؟
اس پر انہوں نے جواب دیا کہ تحریری مواد پر بھی یہ سہولت مہیا کی جائے گی۔
انہوں نے اس حوالے سے مدت کا تعین نہیں کیا کہ کب یہ سہولت دی جائے گی، البتہ ٹوئٹر پر اس حوالے سے گفتگو شروع ہو گئی ہے۔
صارفین شدت سے منتظر ہیں کہ ٹوئٹر پر بھی مونیٹائزیشن کا آغاز ہو جائے تاکہ جن لوگوں کے فالورز کی تعداد بہت زیادہ ہیں، انہیں اپنی ٹویٹس اور ویڈیوز پر معاوضہ ملنا شروع ہو سکے۔
